بختیار واهابزاده و یوسوف خیال دونیادامیزدان اوچماغا- م.ع. زنگین
يئيگون(جمعه) ١٦ اسفند ۱٣٨۷ - ٦ مارس ۲۰۰۹
اؤتن گونلرده دونیادامیزدان اوچماغا اوچان ایکی بؤیوک تورک شاعیری بختیار واهابزاده و یوسوف خیال اوغلونون سینیرلارا سیغمایان روح لارینا سونولور. م.ع. زنگین.
بیر یاغمورلو بالیقلار آیینین
سیسلی بیر آخشامیندا گئتدین
هر آخشام گلدییین کیمی
کاوئرینه چولانمیش
دوداغیندا یاری یانمیش سیگارئت
هر آخشام قارا گؤن کاوئرینده گلردین سیگارین کؤزه رر کن
آما بو آخشام گئتدییینده
بیاض کاوئره بورونموشدون
دوداغیندا یاری یانمیش سیگارئتین سؤنوک
هر آخشام استانبولدان کوسدویون کیمی
کوسدون بو آخشام یاشاماقدان
اللرین اوشوموش کیمی هر آخشام
اوره گین اوشوموشدو بو آخشام
سیسلر بولواریندا گئتدین
آتیلانین آردیندان
بی اوغلو بی لر بیی نین سونا قالمیشین غایب ائتدی
و چنلی بئل دلی لرین سونا قالمیشین
آتاتورک بولواریندا رویالار بؤیومز داها
و من اکسیله رم هر سحر
ارییه رم هر آخشام
"گئتمه نه اولور
تکرار گئتمه نه اولور"
ائهئئئی! آدام اوغلو
یالنیز بوراخما منی ایت لر سوفراسیندا
باغیردیم
آما سن دویمویور کیمی هئچ بیر سسی
بلکه ده دویاراق سایمییورسون
ایشته گئری دؤن دئدیم
سنه آغی سؤیله مک اؤلومدن داها آجی
اؤلومدن داها چتین
منه حقارت ائتمه
آغیتلار سؤیله مه یه مجبور ائدرکن
گول هر آخشام گولدویون کیمی
آرتیق اوسانمیشام آجی گرچک لردن
گول خیال لاریمدا کی تانری
سن خیال اوغلوسان
و خیال لاریم سنسیز یاشاماز
ائی خیال تانریسی!
قیشقیردیم
باغیردیم
آغلادیم
سن گئدییورسون گئری دؤنمه دن
سیسلر اوتاجاق سنی
و بیز قالاجاییق یئنه بو غوربتده
دلی روزگارلار ایچینده دیدرگین
سندن سونرا تورکولر زهر دادی وئره جک
سنسیز آرتیق توخوناجاقلار تورکولریمیزه نانکورلر
قیزیل قان اولوب اوره ییمزه سیزر کن
گئجه نین باغرینا آخان تورکولر نهری
