یاریسی غزه ده پارچالاندی اوره گیمین- م.ع. زنگین
آراگون(يکشنبه) ۲۹ دی ۱٣٨۷ - ۱٨ ژانويه ۲۰۰۹
اورتا دوغونون بؤلوک بؤلوک بؤلونن خالقلاری، اؤزل لیک له بؤلونموش آذربایجان و فلسطین و یارالانمیش اورک لریمیز، قاراباغ و قزه یه اتحاف.
یاریسی غزه ده پارچالاندی اوره گیمین
یاریسی قارا باغدا
یاریسی سیبئریادا دوغراندی جییریمین
یاریسی سینا بوزقیریندا
جمال ایله چییین چییینه آلتی گون ساواشدیق(1)
آلتی گونده یارانین کیمی کایینات
آلتی گونده بیتدی هر شئی
جلادلار اللرینین توزون چالیب ائولرینه دؤندولر
یاراتمیشدیلار ایسته دیکلرین
من قالدیم یانیق چؤلده
سانکی آدمدیم هبوط ائتمیش مصیبت لر چؤلونده
بهشتیمیزاودا چکیلدی
آدم بوغدا یئمیشدی سه
بیز بیردانه داری دنیده بیله یئمه میشدیک
نه چون بو مکافاتی یازدیلار بیزه؟
بیز کی
نه توپراغا الله لیق ائدنلرین بوغداسین یئمیشدیک
نه ده آلماسینا ال اوزاتمیشدیق باتی و دوغو باغلارینین
یارانان گوندن "آرا قارداش" اولدوق قارداش!
بیری باشیمزدان تاپتادی
بیری قیچیمیزی قیردی
تکجه گوناهیمیز اورتادا یارانماق
کاییناتین اورتاسیندا
اورتا دوغودا
هیچ آینیمادی باشیمیز غوغادان
بیر گون آیی پنجه سینده دیدیلدیک
بیر گون قارتال بالاسینا یئمگ اولدوق
ایندی سه بؤلوشدورمه یه چالیشیرلار یئنی باشدان بیزی
تهران ایله واشینگتون آراسیندا
اوزاق دئییل بیر گونده یاریمیزآزادلیق هیکلینین ایاغیندا قوربان کسیلک
یاریمیزدا ایسلام پالتاریندا گلن یئنی الله لارین
بئله گئتسه گئدیشاتی دونیانین
کیم نه بیلیر!
بلکه ده بؤلونن گون چوخ لاری دا سوفراسیندان پای آپاردی الله لاریمیزین
ایندی کی نه جمالیمیز وار نه کمالیمیز(2)
ایندی کی باش ایمیشیک تورلو تورلو قیلینجی گیزلین تیلویزیاسی آچیق الله لارا
ایندی کی اؤز الیمیزه قیلینج وئریبلر اؤزوموزو دوغراماغا
ایندی کی بیز دوغراییب اؤزوموزو
اونلار یالنیز پایلارین آپارماغا گله جک لر
ایندی کی ……..
1- عرب قهرمانی جمال عبدالناصرایله اسرائیل آراسیندا گئدن 6 گونلوک ساواش 1967 ایلینده .
2- جمال عبدالناصر بؤیوک عرب و مصطفی کمال آتاتورک بؤیوک تورک قهرمانلاری.
