امام حسین عذاسی یوخسا شوونیستی تبلیغلر
زنگانلی آلتای
بیرینجی پرده
نئچه ایل بوندان قاباغا کیمین کی استاني شبکه یوخودو، زنگاندا بوتون نوحه لر و عذادارلیقلار، محرم و اوروشلوق آییندا یالنیز تورکجه گئدیردی. آمما بو سینیخ اوستانی شبکه گلندن سونرا، گئتدیکجه بونودا الدن وئریریک. نئچه ايل دي زنگاندا چیخان دسته لر، سراسری و یا بین المللی شبکه لردن یاییلدیغینا گوره، هر ایل گوجلنیب و عظمتلنیر. بونون بیر خئیری کی بیزه اولدو بودور کی زنگانین تورک اولماغینی بوتون دونیایا یایدی. تاسوفله ایران حکومتی بونو دا بیزه چوخ گوروب الیمیزدن آلماق ایسته ییر. بو ایل زنگان دسته لری و اوزل لیکله حسینیه و زینبیه دسته لری ایرانین ایچری شبکه لریندن و بین المللی سحر شبکه سیندن یایلدی. بو یاییلمالار بیزه خوش باغیشلامادی. بونا گوره کی نوحه اوخویانلارا دستور وئریلدی کی گَرَک فارسجادا اوخوماغیز اولسون بونا گوره کی بو بوتون ایرانا یاییلیر. اونلاردا ساده حالدا بو دستورون سیاسی اوزونه باخمایاراق، اونلارین دستورونو یئرینه قویوب و اوخودوغلاری مدیحه لرین یاریسینی فارسجا اوخودولار. اوردا اولانلارا و یا تلویزیوندان باخانلارا راحاتجاسینا آیدین ایدی کی فارسجا اوخوناندا میللتده هئچ عذادارلیق حیسسی یوخودو، چونکو اوردا اولانلار اوشاغلیغدان اوز دیللرینده امام حسینی و اونون باشینا گلن ایشلری اورگنیب و باشا دوشوبلر و باشقا دیل اونلارا اویغون اولماماغینا گوره ده اونو هئچ خوشلامیرلار. بوردا بیر سورغو وار و اودا بو کی: مگر فارس شهرلرینده چیخان دسته لره ده دستور وئریلیرکی چون سیزین عذادارلیغیز بوتون ایرانا یاییلیر بس سیزده تورکجه، عربجه، کوردجه و ... ده اوخویون؟ هدف عذادارلیقدی یوخسا فارس لاشدیرماق؟
ایکینجی پرده
نئچه گئجه دی زنگانین ایشراق شبکه سی ایرانین بین المللی سحر شبکه سی ایله بیرلیکده برنامه آپاریرلار. بو برنامه ده سحر شبکه سینین آپاریجی سی قوزئی آزربایجان دئییمینده دانیشیر و زنگانین آپاریجی سی دا، زنگان شبکه سینده دستور وئریلن دئییمده. هر گئجه زنگانین بیر و یا ایکی نوحه دییه نی اورا گلیب و امام حسینه گوره دانیشیب و نوحه اوخویورلار. بوندان کئچَک کی نوحه لرین یالنیز فعلی تورکودو. بو برنامه ده بیر موبایل نومره سی ده صفحه نین آلتیندا گئدیر کی باخانلار بو برنامه ایله ایلگیده اولسونلار. زنگاندان و یا ایرانین آیری یئریندن آچیلان تئلفونلاری آلمییاراق یالنیز قوزئی آزربایجاندان و یا آیری اولکلردن آچیلان تئلفونلارا اهمیت وئریلیر. تئلفون آچانلاردا چوخلو تانینمیش آداملاردی کی ایرانین تربیتی آلتیندا بویویوب و تاثیر آلیبلار. تئلفون آچانلاردا چوخلو قوزئیین "نارداران" شهریندن دیلر. پنج شنبه گئجه سی حاج غلامرضا عینی فرد بو برنامه نین قوناغی ایدی. بیرآز دانیشاندان سونرا دئدیلر بیر تئلفونوموز وار جمهوری آزربایجاندان. بیر کیشینین سسی گلدی. او اوزونو تانیتدیریب و دئدی کی نارداراندان زنگ آچیب. سونرا بیراز حاج غلام رضا دان تعریفلدی و اونملی بیر مسئله نی ده آچیقلادی. بو سوزو ایله: "حاج غلامرضا آقا. من گئچَن ایله کیمی سیزی تانیمیردیم. تانیشلارین بیری! دئدی کی ایران کنسول لوغوندا گوزل مدداحلیق سی دی لری وار کی ایران دان گتیریبلر من اولاردان آلیب فایدالاندیم. منده کنسول لوغا گئدیب و سیزین نئچه سیدیزی آلیب و گوزل سسیزی ائشیتدیم. اوندان سونرا چوخ ایستردیم کی سیزین سسیزی یاخیندان ائشیدیم و بو ایمکان بو ایل منه قیسمت اولدو".
نئچه واقت قاباق " هفته دفاع مقدس" ه گوره ایران شبکه لرینین بیریندن، ایرانلا- عراغین ساواشینا گوره بیر گزارش یاییلدی کی نارداراندا ییغمیشدیلار. اوردا دانیشان ناردارانلیلار، ایران ساواشینی چوخ گوزل ایضاحلاییب و حتی ایرانین عملیاتلارینین فرمانده لرینین آدینی، شهید و اسیر اولانلارین ساییسینی و عملیاتین یئرینه دک ایشاره ائلیردیلر. سیزجه ایراندا بونلاری مردم دان سوروشسان، نئچه سی دوزونو بیلر؟ بونلار اوزلریندن سوروشمورلار کی: بس بیزکی ارمنی لرین قاباغیندا اوزوموزدن مدافعه ائدیردیک، نییه ایران کی دنیا مسلمان لاریندان مدافعه ائتمه سینین داشینی سینه سینه چالیر، نه ایچین ارمنی لرین طرفینی توتدو، گونئی آزربایجاندان گلن یاردیملارین قاباغین آلدی و مرزلرینی آزربایجانلا باغلادی؟
سورغوم بو پرده ده بودو: بس او نه ایش، بو نه ایش؟ نییه بیر طرفدن زور ایله زنگاندا و باشقا شهرلرده فارسجا مدداحلیغی یولا سالیر و تکجه مدداحلیق قالمیشدی کی فارسی اولماسین اونودا المیزدن آلیرلار و او بیرسی طرفدنده ایسلامچی لیغی و ایران چیلیغی تبلیغ ائلیر؟
