زنگانلی

«آزربایجان اؤزو غززه دیر، آما آیری بیر شکیلده»

زنگانلی آلتای

بیرگون یولداشیمی گؤرمک ایچین اونون باققال خاناسینا گئتدیم. بیرآز دانیشاندان سونرا بیر قوجا کیشی[1] ایچه ری گیردی. کئف احوالدان سونرا بیر پاکات بالا بهمن سییاری ایسته دی.

یولداشیم سییاری وئره- وئره اونا دئدی: عمی نه خبر؟ نئچه واختدی یوخسان؟

قوجا کیشی دئدی: ... دادا هر نه بلا اولسا کاسیبین باشینا گلر. هاوا سویوقدو، ایشده ،بیز مئیدانداکیلارا؛ ایستیده تاپیلمیر، سویوغوندا آلله رحم ائله سین.

 بیر گون مئیداندا دورموشدوم، بیری گلیب دئدی :«مان نیشان»[2] کندلرینین بیرینده بیر ایکی گونلوک ایشیم وار. صاباح گل اونو باشلا.

قوجا کیشی آرتیردی: من ده پولسوزلوغا گؤره 7 باش عائیله نین خرجینی تاپماق ایچین صاباح زنگاندان او کنده طرف یولا دوشدوم. یئتیشندن سونرا او کیشینی کندده تاپمادیم. و ماشین اولمادیغینا گوره  چؤلدن کسمه یول جادایا طرف یولا دوشدوم اوزومو زنگانا یئتیرم. قار- بورانین آلتیندا اسه- اسه گلیردیم. بیر قوردونان اوز- اوزه گلدیم. گوردوم، قورد منه یوگورمک ایسته ییر. تئز کوتومو چیخاردیب قولوما دولادیم و قورد قاباغا گلنده قولومو قوردون آغزینا وئریب، پیچاغینان اونو نئچه یئریندن ووروب اونو ایشدن سالدیم.

هیجانلا بولاری دئدی. بیر آن حالی دئیشیلدی آرتیردی: او آندا بیر جیپ ماشینی تاپیلدی. یاخینلاشاندان سونرا ایکی نفر دوشوب یانیما گلدیلر. اونلار اوزلرینی شیکاربان معرفی ائلییب، دئدیلر: بو حئیوانی اؤلدورمک ایچین گرک بیز ایله زنگانا گلیب و منابع طبیعی ایداره سینه جاواب وئره سن. اونلار قوردو ماشینین دالینا آتیب و منی ده میندیریب زنگانا گتیردیلر.

سورا بئله دئدی: چوخ باشیزی آغریتمیرام، زنگاندا منه، قوردو اولدورمک ایچین 300 مین تومن جریمه یازدیلار. بیر طرفدن ایش یوخ، بیر طرفدنده بوجور. گرک دایانایمیشام قورد منی یی یئیمیش، چونکو اونون دیری مندن یوخاریمیش. هر حالدا چاره سیزلیک دن تهرانین ایداره سینه گئدیب و باشیما گلن ایشی اونلارا دئدیم. او شکاربانلارین بیری من قوردونان یاپیشاندا فیلم چکمیشدی. اونودا آلیب تهراندا گوستردیم. اونلاردا فیلمه باخاندان سونرا گؤردولر کی اوز جانیمی قورتارماق ایچین او حئیوانی اولدورموشم، یاخامدان اَل چکیب و جریمه نی باغیشلادیلار.

سییارینین پولونو وئریب و قاپیدان چیخاندا سؤزونو بئله قورتاردی: بو مملکتده حئیوانلارین دیری بیزیم کیمی اینسانلاردان یوخاریمیش! بیر سیرا آداملار نفتین، قندین، شکرین، یاغین و ... پولونو جیبینه دولدورور و ایسته دیگی یئری ده آبادلاییر، کیمسه دینلنمیر، بیزده تومنه گول له آتیریق و بئش قیران خرجیمیزی تاپماغا گوره بئله ایشلر باشیمیزا گلیر.

منه اوز چؤندریب دئدی: حاجی اوغلو، بو ... دادادان مطمئننم آمما سن الله منی ساتما یازیغام، اوشاغلاریم دده سیز قالار.

و بیر سییار آلیشدیریب گئتدی ... .

سونوندا سؤزوم بودور: کیم بونلارین دردینه یئتیشمه لی دیر؟ بو دردلردن آزربایجاندا نه قدر وار؟ نئچه سی ایش تاپماق ایچین یوللاردا ماشین صانیحه سینده اؤلور؟ نئچه سی آیری یئرلرده ایش تاپماق ایچین دیدرگین دوشور؟ و ... ؟   

(بو یازی ناغیل دئییل بلکه دوغرو بیر واقعه دی. دیققت له باخساق چوخونو بونا تای گؤره ریک.)

[1]. یولداشیم او کیشینی نئچه ایلیدی تانیردی و اونون یاشاییشیندان خبری واریدی.

[2]. زنگانین شهرلرینین بیریدی.